M I S I O N I  Y N Ë

 

Nisur nga dëshira e mirë për t’i shërbyer sadopak Fterrës sonë dhe në mirënjohje të saj, ne tre bij të këtij fshati, që lindëm në Fterrë, menduam të botojmë këtë gazetëz këtu në Tiranë, në shërbim të Fterrës dhe gjithë bashkëfshatarëve tonë të kudondodhur, nëpër Shqipëri e deri jashtë Atdheut.

Në faqet e saj të vogla do të përpiqemi të pasqyrojmë me korrektesë shkencore e profesionale në radhë të parë historinë e kulturën e Fterrës dhe të fteriotëve, jetën dhe punën e fshatit e të bijve të saj, traditën dhe edukatën, bashkimin e vëllazërimin e përhershëm me njëri-tjetrin e me miqtë e shokët, të kaluarën më të largët e më të afërt, deri në ditët tona.

Shpresojmë dhe besojmë që, me punën tonë e me ndihmën e mbështetjen e të gjithë fteriotëve, të japim një kontribut modest në misionin tonë për të mbjellë më shumë harmoni ë më shumë mirënjohje, më shumë kulturë e më shumë dituri për fshatin dhe bashkëfshatarët tanë. Do të ishim të gëzuar që t’i shërbejmë sadopak veçanërisht brezit të ri në fshat e jashtë tij, që çdo banor në Fterrë dhe me origjinë nga Fterra ta ndjejë veten krenar e i nderuar që ka gjak dhe edukatë nga ky fshat i vogël me emër të mirë.

Mirënjohje për fshatin, respekt e dashuri për çdo fteriot, të mira në çdo derë e çdo familje!

          Paç mbarësi moj "Fterra jonë" .

                                                                                                     Botuesi

 

Gazeta  "Fterra jonë" Nr. 1 – maj 1997