Gazeta "Fterra jone"

15 vjet gazeta “Fterra jonë”

MISIONI VAZHDON

U mbushën 15 vjet qe kur doli numri i parë i gazetës “Fterra jonë”. 15 vjet nuk janë pak, por as shumë, se misioni i kësaj gazete vazhdon dhe do të vazhdojë për aq kohë sa të jetojnë fteriotët dhe duke qenë se Fterra dhe fteriotët janë të përjetshëm, edhe gazeta do ti shoqërojë ata.

Me plot të drejtë mund të themi se gazeta “Fterra jonë” gjatë gjithë këtyre vjetëve njohu vetëm ngjitje, në sasi e cilësi, në rritjen e numrit të lexuesve dhe të bashkëpunëtorëve të gazetës, në rritjen e kujdesit të fteriotëve dhe miqve te saj për mbarëvajtjen e gazetës. Duke ruajtur misionin e saj për ti shërbyer Fterrës dhe fteriotëve botuesit dhe bordi i gazetës u mbështet në disa kolona kryesore.

Mbështetjen më të madhe kjo gazetë e gjeti tek fteriotët dhe miqtë e tyre kudo ku ndodhen, në Shqipëri dhe jashtë saj. Ishte interesimi dhe këmbëngulja e tyre që gazeta të dalë rregullisht dhe të zgjerojë gjeografinë e shkrimeve, te tematikës, të numrit të lexuesve, të shpërndarjes dhe përhapjes së saj në të gjitha format që ofron koha sot. Në këto vitet e fundit u krijuan rubrika të reja si “Të njohim biznesmenët fteriotë”, rubrika “Larg dhe Afër”, “Intervistë në distancë”, “Sa i njohim toponimet e Fterrës”, “Çfarë shkruajnë të tjerët për Fterrën dhe fteriotët (ose Libri i Përshtypjeve)”, etj. Në këto rubrika, që duhen përsosur më tej, u pasqyruan shkrime të ndryshme që japin një informacion më të plotë për Fterrën dhe fteriotët. Me interes është pritur shtojca prej 4 faqe që ka filluar nga Nr. 64 – shtator 2009, në të cilën pasqyrohet krijimtaria shkencore e letrare e bijve të Fterrës, e cila do të vazhdojë të paraqes këto figura të rëndësishme të Fterrës dhe më gjerë. Në këtë mënyrë sot gazeta “Fterra jonë” del me 20 faqe, nga 8 faqe qe doli në fillimet e saj dhe 16 faqe vite më vonë.

Bashkëpunëtorët e gazetës kanë qenë një shtyllë tjetër tepër e rëndësishme, ata nëpërmjet shkrimeve të tyre, që nga shkencëtarë të mirëfilltë, shkrimtarë apo artistë, juristë apo ekonomisë e deri në shkrimet apo vargjet e bejtet më fjalë të thjeshta, por të pastra shpirtërisht, kanë dhënë materiale e dokumente interesante, shpesh herë të panjohura, por me një vlerë të madhe. Vlera e një shkrimi më shumë qëndron në atë se çfarë shkruan dhe jo se kush e ka shkruar. Botuesi dhe Bordi, i falënderon të gjithë, pa përmendur emra një nga një, sepse ata janë të gjithë në Shtojcën Speciale të këtij numri. Një homazh të veçantë u bëjmë në këtë përvjetor disa nga bashkëpunëtorëve të gazetës, të cilët janë ndarë nga jeta. Në kujtim e mirënjohje të tyre në shtojcën speciale kemi paraqitur pjesë nga shkrimet e tyre ndër vite.

Shtyllë “betoni” për gazetën kanë qenë e janë sponsorizuesit, ata që kanë bërë të mundur botimin e saj që nga numri i parë dhe në vazhdim. Ata janë mbi 70, njëri më i mirë se tjetri, të gjithë bujarë, që nga biznesmeni apo nëpunësi civil, deri tek pensionisti, të cilët kanë hequr diçka nga vetja, nga familja e tyre, për ta ndarë atë me ata qindra lexues të gazetës. Dhe këta të fundit, bashkë me Botuesin ju a dinë për nder dhe i falënderojnë. Në ekonominë e tregut asgjë nuk mund të bëhet pa mbështetje financiare. Por edhe ata qe merren me shpërndarjen e gazetës në Tiranë, Kombinat, Sarandë, Vlorë, Fterrë, Borsh e deri në Athinë kanë një rol të rëndësishëm dhe meritojnë falënderimet tona.

Nuk përmenda asnjë me emër për ta falënderuar dhe këtë e bëra sepse do të më duheshin disa faqe që ti përmend të gjithë, sepse secili në mënyrën e vet ka dhënë ndihmën e tij për gazetën, por edhe mundet të harroja ndonjë dhe të krijoja probleme, siç mund të ndodhë në ndonjë rast të veçantë. Me këtë rast, në emër të Botuesit dhe Bordit, ju siguroj se nuk ka asnjë keqdashje, asnjë paragjykim, asnjë nënvleftësim, në rast se për ndonjërin nuk është shkruar në gazetën “Fterra jonë” , nuk i ka dalë diku emri apo fotografia, ato janë rastësore ose gabime njerëzore.

Elektronika sot është bërë edhe një mjet i fuqishëm komunikimi. Prej 12 vjetësh gazeta “Fterra jonë” është e publikuar në internet dhe atje mund të gjenden të gjithë numrat, të gjithë shkrimet dhe të gjithë fotografitë. Këto vitet e fundit neve e shpërndajmë gazetën edhe nëpërmjet postës elektronike, e mail, dhe ne Facebook. Atje duket më shumë cilësore, sepse është me ngjyra. Gëzohemi që interesimi është i madh, kjo duket edhe nga klikimet në faqen e Fterrës, ku vendin kryesor e zë gazeta “Fterra jonë”, janë mbi 50 mijë klikime. Kjo punë do të vazhdojë me shpresë për ta përmirësuar cilësinë.

Së fundi dua të falënderoj gjithë Bordin e gazetës “Fterra jonë”, botuesit dhe bashkëpunëtorët, të cilët me ndjenjë përgjegjësie kanë ndihmuar në mënyrë të veçantë për ta bërë gazetën një mjet të rëndësishëm informacioni, e pse jo edhe bashkimi e vëllazërimi midis fteriotëve dhe miqve e dashamirësve të tyre.

Agron XHAMA